Minkana mi ne mevale mebaé, minkana baku a minkana ba kan. Minkana ba ku mine abime bifia éziñ, ve  minkana ba kan mine mingumba minkañete. Minkana ba kan mi a liti avale bôte ya melu mvus be nga nyiñ, avale be nga kobô mejô a tyi’i me. Minkana mi ave fek, bôt be nga kobô mingumba mejô ve a minkana. Nne be nga yeme minfefek mi bôt été. Melu mvus, alu se, bôt be nga sulan aba a laane minlañ. Benya bôtô be nga kobô mejô, be kane minkana, bongô be nyoñe abui fek été.

Ba kane minkana (mi ba ku a mi ba kan) éyoñ ba kobô mejô : mejô m’aluk (éve’e’aluk), mejô m’élik, mejô ya ézezañ bobenyañ nge bôt be too vôme wua, a mejô ézezañ meyoñ.

Bia simesane na minkana mi ne jôm ya ba’ale mfa’a ya metume mangan, ajô te bia yi na mi yem minkana. Abui fek a abui melep éne minkana.  Minkana mi ne ngun bôte ya melu mvus be nga kalane bia.

Minkana bia tili e “site” nyô, bi nga bi mie mevale meval, abui ya été, nyia wongan Ntyam Ekaka Pauline a monyañe wé Abou’ou Ekaka Esther be nga bô be kane bia mie mame ngôé. Abui avok ya été bi nga lañe mie kalate minkana aval’ane Pasteur A.I. Good a nga tili amu a nga “simesane na, mi ne nya jômô ya ayoñe Bulu”. Pasteur Good  a nga nyamete na nge be ne tili minkana ane bôte bese be ne ngule ya lañ. Bia buni na nyametane wé ô tôbaneya mfa’a ya “site” nyô, a minkana mife, bi nga wôk ane bôt be nga bo be kanek.

Minkana ba kan mi ne bo bôt, mi ne fe bo betit. Bi ayen ane betit be too ane bôt, be lu’u binga, be biaé bon, be bé mefup, be la’ane minlañ. Betit été bia yen ane Kulu ane étua mfefek, Ze nsusuk, Okpweñ ôkukut abé, éwôlô Ojoé, Zok ndudumban, akk.
Bia yiane yem a kalane minkana.