Nde mongô a nga futi nyôle zen, wô ! be ndômenyañ. A nga nyin aba. Ndômenyañ é zu batane nye. A nyin nseñ, kabate fa, monekal a nga di.

Melu mebaé, mongô nye na,

“Me nga sôp. Me nga bialé te jôme ya lu’ane je, nde m’ate zu na, ô vuu ma ».

Nye na,

« Eññ ».

Nde ndômenyañ a nga kôlô si, a bi na, binga betan, fam ébaé, kabat ébaé, bekôô mimbañ, ve sulane mongô si, nye na,

« Toké’é, ô ke lôñe ja ».

Mongô nye na,

« M’ayi ke biôme bite ».

Ndômenyañ na,

« Me bo aya ? »

E nga be’e akume so ; ataté nga, a fulane zaman nduan, ézan, nduan abom, nkuta nku, ôlé nsômba, ve sulan akume si. Nye na,

« Womien nyoñok, ô ke bo ane w’aye bo ».

Mongô na,

« Me te nyoñe bili ».

Nye na,

« A mone wom, za jôm éfe m’aye kee wo ? »

Nye na,

“Wo ke bo’o me ane ô nga bo ; jôm é nga kômôn akume di, nje m’ayi”.

Ndômenyañ é semé, nye na,

« Ye w’aye yeme ba’ale ? »

Mongô na,

« Wo ô tame me ve ».

Nde ndômenyañ é nga nyin, a ke to’é ôyôm ékoé ôlam, a ôyôme mia’a ya été, nye na,

« Bo’o na, éyoñ w’aye kui ja dôé, ve nyin afan, ô kui ékoñolo betit b’alôt, ô lam ékoé ji. Eyoñ w’aye ke, ô taté’é mane lôñ ébem, ô kele ke bidi. W’aye bulan nlam ve éyoñe jia, éyoñ éte ô biya Abui. Olame vi ô ne jôé na Abui. Eyoñ w’ake ji, bisisi’a he ! Ô be wô’é »

Nde ndômenyañ é nga mane nye lep, nye na,

« Nge ô bi Abui, éyoñ éte w’aye yen akum ».

Nde mongô a nga lumbu ja dé, a nga koé nyia. Nyia na,

« Ye a ve wo ? »

Nye na,

« A ve ma ».

Mongô a bômbô si na, melu  mebaé, nye na,

« A nan, bo’o me bidi, me nga ke afan ».

Nde nyia a nga mane kômesande bidi. Mongô ve to’é ôyôm ékoé, a mone mia’a ya été, a nyoñe ke fa, a beta ntum akoñ, ve late mo. Nde a nga lumbu afan.

A kui beta afane zañe na, a lô ve ne ndeñdeñ ! Beta ékoñolo a lôt. Nde mongô a nga jô’é ékoé si, a nga mane lôñ mbas, a kôban nduan. Nde a nga to’é ékoé, a nga mane lam ôlam. Ane mongô a nyi’asu na, a ye ke abanda, a vô’ôlô mvuse na, bôm !

“Miok ! miok ! miok !”

Mongô ve bulan, a koé na, Ojoé ô tii. Ve tele akôñe yôp, a ye lum Ojoé, Ojoé na,

“Soñ ! Jôké’é nja’a ma, Abui a zu »

Mongô ve tiin Ojoé. Ojoé ô lôte mbil afan akôé. Mongô na,

« Ngo’o Ojoé me ve ye taté bupe jôm ».

Nye na,

« Vie ô kelek ».

Mongô a nga mane kolé ôlam. Ane a ye bu’u tyiñ a ke mvus, a vô’ôlô mvuse na, bôm !

“Miok ! miok ! miok !”.

Mongô a nga zu, a koé na, Okpweñ ô yeme. Ve bête akoñ, a ye lum Okpweñ, Okpweñe na,

“Jôké’é ma, yange’e, Abui a zu mvus”.

Mongô na,

« Nne ndômejañ a nga lepe me va ».

A nga tiin Okpweñ. Okpweñ wôô ! ñvie vi ake vi.

A nga mane kolé ôlam, ve lumbu aban. Ane a ye ke je’an éto, a vô’ôlô na, bôm !

“Miok ! miok ! miok !”

A koé na, Sô é ntii. Mongô ve futi Sô mo nyô, a jô na, a wôé Sô, Sô na,

“Jôké’é ma, yange’e Abui a zu mvus”.

A nga vaa Sô ékoé tyiñ. Sô é lumbu afan akôé.

A mane kolé ôlam, a lumbu aban, a nga di bidi. Mfa’ane a ngenan a ja’ak, ôlam ô bii, bôm !

« Miok ! miok ! miok ! »

A koé na, Mvin é yeme. A ye wôé Mvin, Mvine na,

Jôké’é ma, Abui a zu mvus”.

Mongô nye na,

« M’aye yen Abui nyina aya ? »

Nde a nga mane kolé ôlam. Ane a lum mvus, a vô’ôlô na, bôm ! a koé na, Zip é yeme. Nye na,

« Ya, Zipe fo’o é ne nya jômô ».

Ve nyokan akoñ, a ye lume Zip, Zibi na,

« Soñ ! te wôé ma, yange’e, Abui  a zu mvus ».

Mongô a nga vaa Zip ékoé tyiñ. Zip é lumbu afan akôé.

A mane kolé ôlam. Ane a lumbu na, a vô’ôlô na, bôm ! A zu koé na, Nyat é ntii. Nye na,

« Ya, ndemben b’ate jô ».

Ve nyimin akoñ, a ye lume Nyat, Nyate na,

« Soñ ! Jôké’é ma, yange’e, Abui a zu mvus ».

Betite bese, ve ne meñelé !

Ane a beta bulan aban, a vô’ôlô na, bôm ! A zu koé ve ne fendaan ! Akôme Zok e fete’e mimbañ. Mongô na,

“Hô ! Nde b’ate fo’o bele. Nyona a ye bo na, me kuane minsôn, me nga koé bekôô mimbañe ba, me nga lu’u binga été ».

Ve ve akoñe yôp, ajô na, a lum akôme Zok. Zo’o na,

“Ko nja’a éngôngo, jôké’é ma, yange’e, Abui a zu mvus”.

Akoñ e nga jeme mongô mo, ne tyip, tyip, tyip ! Mongô nye na,

“Nne fo’o môt a bo jôba’an ana. Betite bese be maneya ke. Si se nyô, m’ayeme fe jôm j’adañe Zok. Ke ake ya be ke, me jô di na, ‘ W’ate yi na, ô beta yene jé ?’”

Nye na,

“Me nga wuya ntuk, me nji ke zu lame môt ôlam ôte”.

A nga vaa Zo’o ékoé. Zo’o é nga ke j’abu’afan akôé.

Mongô a kolé’ôlam, a tyibela’an, nye na,

“Abime jôm m’asuu dina, m’aye yen Abui nyina ane jé ? Tit ése é maneya ne meñ ! »

Nde mongô a nga lumbu ébem, a nga beta di bidi.

Oyôm éyoñ ve lôt, ne señesan ! Nye na,

« Jé é bo ? Ye ôlame vi ô wô’ô tabe ntaa va ? »

Ve bômbô si. A ye bo na, a lekan ôyo, a vô’ôlô na, bôm ! Ôyôm ntat ô nga jô. Mongô ve dutu akoñ ba fa, a ke jimbi ôlam, a zu koé na, ôyôme jôm ô tii ôyôm ôtitipetane jôm, te yem avale jôm ete ebien. Mongô a ntele ne séé ! Nye na,

“Za avale jame di ! Me maneya suu benya biômô, za avale jôm e tii me ôlame di ? »

Ve bete akoñe yôp, a jô na, a ke lum, Abui a telé anyu yôp, nye na,

“Soñ ! A mone nyina, te wôé ma. Abui a wu étome jé ? »

Mongô na,

“Nde wo ô ne Abui ; ke ô wuya. Ye m’ate mane suu benya biome va ?

Ve telé akoñe yôp, a kele ne ji’i ji’i jiik ! a jô na, a ke lum Abui akoñ. Abui a bôé ñyôn, nye na,

« Kate’e me jôm w’ayi, me Abui, me kee wo je ».

Mongô na,

« Ke m’ayi binga abui abui ».

Abui ve telé anyu yôp, nye na,

“Nga mi awô’ô na, Abui a wu étome binga–ôô ?”

Ve fé é nga zu j’anyaé : mfa’étum, évôm, nnôm, ntet, ne fôlôt ! Mongô a daa mvus, binga be nga ke nlam.

Ve bete akoñ, a jô na, a ke lum Abui, Abui na,

“Jôké’é ma, A mone nyina, ô nga yi fe jé ?”

Nye na,

“Abui binga di, befam b’aye loñe me ja, b’aye so vé ?”

Abui ve telé anyu yôp,

“Nga mi awô’ô na, Abui a wu étom befam–ô ?”

Fam mewôm metan, fôlôt ! Mongô a daa mvus, befam be nga yoñelane ja.

Mongô ve té akoñe yôp, a jô na, a ke lum Abui, abui na,

“Nne ô nga yi fe jé ?”

Nye na,

“Nde nkukum w’abo ô tabe’e te biyem nseñ ?”

Abui ve bête anyu yôp,

« Nga mi awô’ô na, Abui a wu étom biyem–ô ?”

Ve na, mfa’a kabat, mvu, kup, ésingi, biôm bite ve ku nkute si va. Ve be nga litan nlam.

Mongô na,

« Nde me tameya yene jôm ? »

Ve lindi akoñ, a jô na, a ke lum Abui, Abui na,

“Me bo fe aya ?”

Nye na,

“Nda nkukum j’abôbo na, akume so, di nsak”.

Abui ve telé anyu yôp,

“Nga mi awô’ô na, Abui a wu étom akum–ô ?”

Ve na, ataté nga, a ke kalan nduan, bizan, nsa’é, mbañe zok, biôm ve ku nkute si. Be nga litan akum nlam. Nde mongô a nga bo kum, a nga vaa Abui ékoé tyiñ. Mongô a bi akum ana amu njiban.

Nde bi wô’ô jo na, “Nge mongô a to ji’a wôé tit, ve a nji bi akum”.

Njiban mongô a nga jibi ô veya nye akum abui.

Ngo’o nge môt ase a bo mewô’ana ! Ôjeja’a môt vi anyoñe ke mfañe jôm si nyô, ve mewôk a njiban, mbie bi ne bifia ya tôñ nge môt a ye bo nya môt môtô.